Налайх дүүргийн мах бэлтгэлийн бүс орчмын хөрсний бохирдлыг шинжилжээ
Нийгэм
Байгаль орчин, уур амьсгалын өөрчлөлтийн яам болон ШУА-ийн Биологийн хүрээлэн хамтран хөрсний бохирдлыг бууруулах чиглэлээр 5 жишиг төслийг хэрэгжүүлжээ.
Дээрх 5 төслийн нэг болох Нийслэлийн Налайх дүүргийн 1-р хороонд орших мах бэлтгэлийн бүс орчмын хөрснөөс 20 цэгийн дээж авч хөрсний эрүүл ахуйн бохирдлыг E. coli titre (гэдэсний савханцар), Salmonella/Shigella (гэдэсний бүлгийн эмгэг төрүүлэгч нянгууд), Clostridium perfringens (агааргүйтэн нян) гэсэн гурван үзүүлэлтээр MNS 3297:2019 “Хөрс. Хот, суурин газрын хөрсний эрүүл ахуйн аюулгүйн үзүүлэлт, бохирдлыг үнэлэх” стандарттай харьцуулан биобэлдмэлийг ашиглахын өмнөх болон дараах үр дүнг үнэлсэн байна.
Шинжилгээний дүнгээр биобэлдмэл хэрэглэхээс өмнө 20 цэгийн 5 нь их, 15 нь дунд бохирдолтой ангилалд байсан бол хэрэглэсний дараах шинжилгээгээр 6 нь дунд, 9 нь бага бохирдолтой болсон бол 5 цэгийн дээж цэвэр ангилал руу шилжсэн үр дүн гарчээ.
Үүнд: Өвчин үүсгэгч тус бүрийн харьцуулалтаар Salmonella/Shigella хамгийн өндөр буюу 73.6 хувь, E. coli 66.0 хувь, Clostridium perfringens 6.7 хувийн бууралттай байсан төдийгүй хөрсний нийт бактерийн тооны бууралт бүртгэгдсэн.
Тухайлбал: биобэлдмэл хэрэглэсний дараах давтан шинжилгээгээр Staphylococcus aureus (алтан шар стафилококк)-ийн илрэлт 10 цэгээс 6, мөөгөнцрийн илрэлт 9 цэгээс 7 болж буурсан бол термофилийн бичил биетний тоон агууламж 20 цэгээс 19-д илэрсэн хэдий ч 10-100 дахин хэмжээгээр буурсан үр дүнтэй байсан байна.
Энэхүү төслийн хувьд хөрсний бохирдлыг бууруулах зорилгоор хэрэглэсэн бэлдмэл нь эмээлтийн мах бэлтгэлийн бүс орчимд хэрэглэсэнтэй адил хэдий ч албан байгууллагын хашаан дотроос дээж авсан тул тухайн байгууллагын ариун цэврийн дэглэм, хог хаягдал хаях зохион байгуулалт зэргээс хамаарч их болон дунд бохирдол эрс буурсан үзүүлэлт гарсан байх магадлалтай.
