Ардчилсан нам шинэчилсэн дүрмээ Улсын дээд шүүхэд хүргүүллээ
Ардчилсан нам Х их хурлаараа баталсан үндсэн дүрмийн нэмэлт өөрчлөлтөө өнөөдөр Улсын дээд шүүхэд бүртгүүлэхээр хүргүүллээ. Улс төрийн намуудын тухай хуулиар шинэчлэн баталсан үндсэн дүрмээ сарын хугацаанд багтаан Улсын дээд шүүхэд бүртгүүлэх ёстой.
Энэ талаар Ардчилсан намын Хэрэг Эрхлэх Газрын дарга П.Нүрзэд "Цар тахалтай холбоотойгоор Улсын дээд шүүх аливаа хүсэлт, гомдлыг шуудангаар болон цахимаар хүлээн авч байгаа юм байна. Энэ дагуу Ардчилсан нам өнөөдөр шинээр баталсан үндсэн дүрмийн өөрчлөлтөө шуудангаар илгээлээ. Ардчилсан нам дүрмээ бүх нэгжээсээ санал авч, удаа дараа хэлэлцэн байж Аравдугаар их хурлаараа баталсан. Нэмэлт өөрчлөлтөд намын санхүүгийн ил тод байдлыг тодорхой болгохоор тусгасан юм. Ардчилсан нам 31 жилийнхээ түүхэнд анх удаа ажил хэрэгчээр хуралдсан. Улсын дээд шүүхэд дүрмээ албан ёсоор бүртгүүлсний дараагаар намын дарга болон бусад асуудлуудыг хэлэлцэнэ" гэлээ.
Үндсэн дүрмийн нэмэлт өөрчлөлт батлагдсанаар Ардчилсан намын шинэчлэл шат ахина гэж гишүүд дэмжигчид нь итгэл төгс байна.
