Хятадад бэлэглэх гучин мянган хонины 23191 нь хандиваар цуглажээ

Монгол Улсын Ерөнхийлөгч Х.Баттулга 02 сарын 27-ны өдөр БНХАУ-д айлчлал хийж, БНХАУ-ын дарга Ши Жиньпинтэй уулзсан билээ. Коронавирусний халдварын оргил үед цар тахлын голомт руу очсон анхны төрийн тэргүүн болж, хүнд нөхцөлд байсан урд хөршдөө 30 мянган хонь бэлэглэж байгаагаа мэдэгдсэн.
Үүний хариуд нь БНХАУ-ын Дарга Ши Жиньпин БНХАУ-д үүссэн нөхцөл байдлаас үл хамааран Монгол Улсын Ерөнхийлөгч Х.Баттулгыг эх оронд нь хүрэлцэн ирсэн явдалд гүн талархаж, "Дусал ус мэт ачлал үзүүлвээс дундаршгүй булаг мэт хариу барьюу" хэмээх Күнзийн сургаалийг, мөн Монголын "Зовох цагт нөхрийн чанар танигдана" гэсэн зүйр үгийг иш татан чин сэтгэлийн талархал илэрхийлж байв.
Үүнийг Монголчууд талархан хүлээн авч, тал бүрээс хонь хандивлаж эхэлсэн. Одоогийн байдлаар нийт 23191 хонь хандивлажээ. Гэхдээ цуглуулж эхлээгүй байгаа аж. Гучин мянган хонийг хятадын талд хэзээ, хэрхэн хүлээлгэж өгөх нь тодорхойгүй юм.

Ц.Сүрэн