Энэтхэгийн агуйд 6 жуулчин өөрсдийгөө тусгаарлаж байжээ

Коронавирусын улмаас зургаан жуулчин Энэтхэгийн агуйд нуугдаж байжээ. Тэд Энэтхэгийн хойд хэсэгт орших Уттаракханд мужийн Ришикеш хотын ойролцоох агуйд амьдарч байсан бөгөөд ням гарагт цагдаагийн ажилтанууд тэднийг олсон гэдгээ мэдэгдэв. Тэд Франц, Турк, Украин, АНУ, Непалын иргэд байсан бөгөөд дөрвөн эрэгтэй, хоёр эмэгтэй байжээ. Жуулчид анх зочид буудалд хонож байсан боловч мөнгөгүй болж, 3 дугаар сарын 24-нөөс хойш агуйд хорогдож байсан талаар Уттарахандын цагдаагийн газрын хэвлэлийн төлөөлөгч Мукеш Чанд хэллээ.  Тэднийг корона вирусаас урьдчилан сэргийлэх зорилгоор хоёр долоо хоногийн турш өөрсдийгөө тусгаарлахыг хүссэн байна. Жуулчид үлдсэн мөнгөөрөө хоол хүнс худалдан авч амь зогоож байжээ.

Коронавирусын дэгдэлтийн улмаас 3-р сарын 20-ны өдрөөс эхлэн Энэтхэгийн иргэд болон гадаадын жуулчдыг Уттаракханд муж руу нэвтрэхийг хориглох шийдвэр гарсан.  

Энэтхэг бол дэлхийн хоёр дахь хүн амтай улс бөгөөд тус улсын эрүүл мэндийн систем вирусын томоохон дэгдэлтийг даван туулж чадахгүй байх магадлалтай гэдгийг судлаачид хэлж байгаа юм.

Ерөнхий сайд Нарендра Моди 3-р сарын 24-нөөс эхлэн орон даяар хорио цээр тогтоосноо зарласан. Тэр өдрөөс хойш 1,3 тэрбум хүн амд зөвхөн ус, цахилгаан, эрүүл мэнд, галын үйлчилгээ, хүнсний дэлгүүр зэрэг чухал үйлчилгээнүүдийг үзүүлэхээ мэдэгджээ.

Эх сурвалж: CNN