Өмнөд Солонгосчууд саналаа өгч байна
Бүгд Найрамдах Солонгос Улсын Үндэсний ассамблейн сонгуулийн санал хураалт өнөөдөр явагдаж байна. Сонгогчид амны хаалт зүүж, биеийн халуунаа хэмжүүлэн, хоорондоо 1м-н зайтай зогсч, нэг удаагийн бээлий өмсөн хорио цээрийн дэглэмийг чанд мөрдөн саналаа өгч байна. Хэрэв сонгогчдын биеийн температур 37.5 С-ээс дээш байвал тусдаа санал авах байранд аваачиж вирусын шинжилгээ авах юм. Түүнчлэн халдвар гарах магадлалыг багасгахын тулд албаны хүмүүс хурууны хээ шалгах төхөөрөмжийн оронд таних машин ашиглажээ.
БНСУ-д Үндэсний ассамблейн 300 гишүүнийг сонгох парламентын сонгуулийг дөрвөн жил тутам зохион байгуулдаг бөгөөд тэдгээр суудлын 253-ыг нь сонгогчид шууд сонгодог. Энэ удаагийн сонгуульд 44 сая сонгогч санал өгөх эрхтэй юм.
Санал авах байранд ажиллаж байгаа албан тушаалтнууд сонгогчдын үнэмлэхийг шалгах үед маскаа түр авахыг хүсч, бусад үед маскгүй ярихаас татгалзан, бага насны хүүхдийг санал авах байранд авчрахгүй байхыг зөвлөв. Нийт 14,330 санал авах байр байгуулагдсан бөгөөд гэрээсээ саналаа өгөхөөр бүртгүүлсэн 100,529 сонгогчдод саналын хуудсыг хүргүүлсэн байна. Цэргийн хуаран, штаб дээр ажиллаж байгаа нийт 254,100 цэрэг, цагдаагийн ажилтнуудад тэдний хүсэлтийн дагуу сонгуулийн мэдээллийг гэрт нь хүргүүлжээ.
Өмнөд Солонгос нь корона вирусийн тахалаас хойш улс даяар сонгууль явуулсан анхны орон болоод байна. Тус улс нь корона вирусийн дэгдэлтийн энэ үед сонгуулиа амжилттай зохион байгуулж, сонгогчдын ирц 60 хувийг давах эсэх нь олон улсын анхаарлын төвд байгаа юм. Хэрэв сонгуулиа аюулгүй, амжилттай зохион байгуулж чадвал бусад оронд ихээхэн туршлага болно гэж үзэж байна.
Эх сурвалж: Yonhap news agency
Сэтгүүлч: Ц.Буяндэлгэр
