Б.Пүрэвдорж: НӨАТ-ыг таван хувь болгох шаардлагатай
НӨАТ 10 хувь байсныг таван хувь болгож өөрчлөх хуулийн төслийг яаралтай хэлэлцэх шаардлага үүссэн хэмээн УИХ-ын гишүүн Б.Пүрэвдорж өнөөдөр мэдээлэв.
УИХ-ын гишүүн Б.Пүрэвдорж дээрх хуулийн төслийг ноднин 12 дугаар сард УИХ-ын даргад өргөн барьсан юм. НӨАТ 10 хувь байсан нь эдийн засгийн хүндрэл гараагүй байсан үед иргэд, аж ахуйн нэгжүүдэд дарамт учруулж байсныг тэрээр мэдээллийн эхэнд онцлов. Тэрбээр, "Энэ 10 хувийн татвар нь Монгол Улсын эдийн засаг, санхүүгийн байдалд тодорхой үр дүнгээ өгсөн. Өөрөөр хэлбэл, НӨАТ нь аж ахуйн нэгжүүдийн орлогыг бүртгэх үндсэн үүргээ хангалттай сайн гүйцэтгэсэн. Гэвч иргэд, аж ахуйн нэгжид хүндрэл учруулж байгааг харгалзан таван хувь болгож багасгах зайлшгүй шаардлагатай байна" хэмээв.
Шинэ коронавирусний халдварын цар тахлаас урьдчилан сэргийлж хөл хорио тогтоосноор жижиг, дунд үйлдвэрүүд хаагдаж, ажилчдаа цомхотгож эхэлсэн энэ үед НӨАТ-ыг багасгах нь эдийн засгаа дэмжих хамгийн чухал арга хэмжээ хэмээн төсөл санаачлагч УИХ-ын гишүүн Б.Пүрэвдорж мэдээлэлдээ цохон тэмдэглэв. Хуулийн төсөл батлагдсанаар, хүнс, бараа нь үнэтэй, алс захын бүс нутагт амьдарч байгаа иргэдэд хамгийн ач холбогдолтой татварын хөнгөлөлт бий болно гэдгийг тодотголоо.
