Сөүл хотын захиргаа Шинчонжи сүмээс 200 сая вонын нөхөн олговор гаргуулах нэхэмжлэл гаргав
Сөүл хотын захиргаанаас Лхагва гарагт мэдэгдэл хийж Шинчонжи Христийн сүм болон түүнийг үндэслэгч Ли Ман-Хэг Covid-19-ыг олон нийтэд хурдтай тархаасан хэрэгт буруутгаж шүүхэд хандан хохиролыг барагдуулах нэхэмжлэл гаргасан гэдгээ хэллээ.
Хотын захиргаа тус Христийн сүмийг гишүүдийнхээ холбоо утасны жагсаалтыг гаргаж өг гэсэн хүсэлтийг удаашруулж, цаг алдсанаараа ноцтой асуудал үүсгэсэн гэж үзэж байгаа юм байна. Тиймээс Сөүл хотын захиргаанаас гурван шатны шүүхээр асуудлыг хэлэлцэхэд дор хаяж 300 сая вон шаардлагатай гэж нэхэмжилж байгаа аж. Зөвхөн ганц шатны шүүхээр хэргийг шийдэхэд 200 сая вон шаардлагатай гэж үзэж байгаа аж.
Сөүл хот тус улсад цар тахлын хэмжээнд хүрээд байгаа коронавирусыг өндөр хэмжээнд тархахад хүргэсэн Христийн Шинчонжи сүмийн эсрэг зарга үүсгэсэн анхны төрийн байгууллага болж байна. Одоогоор уг шашны урсгалыг үндэслэгч Ли гишүүдийнхээ бүртгэлийн жагсаалтыг хотын захиргаанд гаргаж өгөхийг хойшлуулах тушаал сүмийнхэндээ өгсөн эсэхийг тус тусад нь хэрэг үүсгэн мөрдөлтийн ажиллагаа хийгдэж байгаа юм байна.
Өнгөрсөн сард Дэгү хотод Шинчонжи сүмийн гишүүдийн дунд халдварын батлагдсан тохиолдол огцом нэмэгдэх үеэр Төв засгийн газраас бүртгэгдсэн 200,000 гишүүдээс гадна бусад гишүүдийн холбоо барих мэдээллийг гаргаж өгөхийг шаардсан байдаг. Сүмийнхэн удаашруулсны эцэст мэдээллийг гарган өгөхөд засгийн газраас бусад муж хотуудад мэдээллийг хүргэсэн юм.
Мужуудын засаг захиргаа тус бүрдээ Шинчонжи сүмтэй холбоотой газар нутаг дээрээ байрладаг барилга байгууламжуудын араас явж, холбогдогчийг олж тогтоох, сүмээс өгсөн мэдээллийг шалгах зэргээр вирусын халдвар тархахаас урьдчилан сэргийлэхийн тулд багагүй хүчин зүтгэл гарган ажилласан.
Шинчонжи сүмийг Солонгос улс даяар вирусын халдвар тархахад гол үүрэг гүйцэтгэсэн гэж тус үндэстэн даяар буруутгаж, үзэн ядах хандлага гарч байгаа юм.
Уг шашны үндэслэгч Ли хэвлэлийн хурал хийж үүнийхээ төлөө уучлалт ч гуйсан байдаг.
Шүүмжлэлтэй хандаж байгаа иргэдийн төлөөлөл болох Чон Ва Дэ уг сүмийг татан буулгахыг шаардсан онлайн өргөдөл гаргасан нь одоогоор 1.4 сая гаруй хүний дэмжлэгийг аваад байна. Шашны бүлэглэлийг татан буулгах нь үндсэн хуульд харшлах ч гэлээ БНСУ-ын Засгийн газраас үндэсний хэмжээнд түгшүүрийн байдал үүссэн цагаар үнэн зөв мэдээлэл гаргаж өгөөгүй алдаа дутагдал гаргасаных нь төлөө хариуцлага тооцож болно гэж мэдэгдээд байгаа юм.
Харин Шинчонжи сүмийнхэн нийгмийн буруутгал, ял зэмлэл нь тус сүмийн гишүүдийг хохирогч болгосон хэмээн үзэж байгаа бөгөөд иргэдийг сөрөг тайлбараа зогсоохыг шаардаад байгаа юм. Тэдний баталж байгаагаар нийгмээс ирж байгаа энэ их шүүмжлэлээс болоод нэг гишүүн нь амиа хорлосон гэлээ.
Эх сурвалж The Korea Times
Д.Алигэрмаа
