Франц иргэнтэй хамгийн ойрхон харилцсан 126 хүн эхний шинжилгээгээр бүгд ХАЛДВАР АВААГҮЙ нь тогтоогдлоо
COVID 19 халдвар илэрсэн Францын иргэнийг Дорноговь аймгаас ХӨСҮТ-д авчирч эмчилж буй. Биеийн байдал хүндэвтэр байгаа хэдий ч амин үзүүлэлтүүд нь сайн байгаа гэдэг мэдээллийг ЭМЯ-наас өгсөн.
Түүнтэй хамт онгоцоор ирсэн, галт тэргээр явсан, уулзсан, гар барьсан гээд нэгдүгээр хавьтлын хүмүүсийг олж тогтоон 126 хүнийг тусгаарлаж шинжилгээ аваад байсан учраас монгол хүн бүр шинжилгээний хариуг чих тавин хүлээж суугаа.
ХӨСҮТ-ийн ерөнхий захирал Д.Нямхүү 126 иргэний шинжилгээний хариу сөрөг буюу халдваргүй гарсан гэдэг таатай мэдээг ЭМЯ-ны ээлжит мэдээллийн үеэр дуулгалаа. Гэхдээ одоо давтан шинжилгээ авч баталгаажна гэдгийг анхаарах хэрэгтэй гэж байлаа.
Эхний шинжилгээний дараа тэдгээр хүмүүсээс 7, 14, 21 хоногт нь давтан шинжилгээг авах бөгөөд эдгээр ажлууд заавар зөвлөмжийн дагуу үргэлжлээд явах юм байна.
Мөн нэг онгоцоор ирсэн ойрын хавьтлын гэж үзэж байсан Оюутолгой компанийн гурван ажилтны шинжилгээний хариу сөрөг буюу коронавирусийн халдваргүй гарчээ.
Д.Алигэрмаа
