Сайн мэдээ: Нэгдүгээр хавьтлын 26 хүний шинжилгээний хариу сөрөг гарлаа
Коронавирус /COVID19/ илэрсэн Франц иргэнтэй гар барьж уулзсан, орчуулагч, хоол хүргэлтийн ажилтан зэрэг хүмүүсийг нэгдүгээр хавьталд тооцон тусгаарлаж, шинжилгээнд хамруулж байгаа тухай Эрүүл мэндийн сайд Д.Сарангэрэл өчигдөр мэдээлсэн.
Тэгвэл дээрх нэгдүгээр хавьтлын 26 хүний онош сөрөг буюу халдваргүй гарсан болохыг Шадар сайд, УОК-ын дарга Ө.Энхтүвшин Засгийн газрын хуралдаанд мэдээлэл өгөх үеэрээ танилцуулсан байна.
Бусад хүмүүст шинжилгээ хийж байна. Мөн давтан шинжилгээ хийж байна гэсэн мэдээллийг ЗГХМА-ны дарга Ц.Ганзориг цахим хуудсаараа дамжуулан өглөө.
Өнөөдөр Лхагва гараг. Уламжлал ёсоор Засгийн газрын ээлжит хуралдаан болдог билээ.
Засгийн газрын өнөөдрийн хуралдаанаар Хан-Уул дүүрэгт баригдаж буй 300 ортой төрөх эмнэлгийг ашиглалтад оруулах, шилдэг уран бүтээлчдэд мөнгөн шагнал олгох, УИХ-ын гишүүн С.Эрдэнийн санаачлан боловсруулсан Тэтгэврийн доод хэмжээг нэмэгдүүлэх тухай хуулийн төсөл, Удлаанбаатарын төв цэвэрлэх байгууламжийн лагийг цэвэрлэх, үнэргүйжүүлэх ажлын явц гээд 17 асуудлыг хэлэлцэхээр төлөвлөжээ.
Засгийн газраас маскаа зүүж, гараа угааж, бие биедээ эерэг мэдээлэл түгээж дархлаагаа хүн бүр дэмжихийг уриаллаа.
Д.Алигэрмаа
