Тусгаарлалтад байгаа зарим иргэд архи уух зэргээр зөрчил гаргаж байгаад хариуцлага тооцно

Эрүүл мэндийн яамнаас COVID-19 халдвартай холбоотой ээлжит мэдээллээ өнөөдөр хийх үеэр тусгаарлалтад байгаа хүмүүсийн гаргаж байгаа зөрчлийн талаар ЦЕГ-ын Нийтийн хэв журам хамгаалах, олон нийтийн аюулгүй байдлыг хангах албаны дарга, цагдаагийн хурандаа Ж.Амгалан мэдээлэл өглөө.

Юуны өмнө зөрчил гаргасан Иргэн бүр Зөрчлийн хууль болон Эрүүгийн хуулиар хариуцлага хүлээлгэнэ гэдгийг мэдээллийнхээ эхэнд онцлоё.

Цагдаагийн байгууллага зөрчлийг баримтжуулж холбогдох материалыг бүрдүүлж байгаа бөгөөд мэдээллийг нэгтгэн хуулийн дагуу хүлээлгэх хариуцлагыг хуулийн зүйл, заалтаар нь тодруулан олон нийтэд мэдээлэх бэлтгэл ажлыг хийж байгаа гэлээ.

Тусгаарлагдаж байгаа иргэдийн дундаас дараах зөрчил илэрчээ:

 Бага баян амралтад тусгаарлагдсан Хөвсгөл аймгийн харьяат иргэн Б "Би эмнэлгийн ажилтан. Бүгдээрээ эндээс гарья хэмээн бусдыгаа буруу зүйлд уриалан дуудаж, жагсаал маягийн юм хийх гэж оролдсон.
 Улсын хоёрдугаар төв эмнэлэгт тусгаарлагдаж байгаа нэг иргэн ачаа тээшиндээ авч ирсэн согтууруулах ундааг уух гэж оролдсон. Бусдад саванд хийж тараах гэж оролдсон ба зарим өрөөний хаалга үүдийг татсан зөрчил гаргасан.
 ХӨСҮТ-д тусгаарлагдсан иргэдээс гаръя гэж дураараа авирласан.
 Налайхын нэг хүн онгоцноос буугаад зугтаах гэсэн.

Монгол Улс хэдийгээр олон талын эрх чөлөөтэй орон боловч хүний амь нас, эрүүл мэндийн төлөө тавигдаж буй шаардлагыг ёсчлон биелүүлэх нь иргэн бүрийн хатуу үүрэг. Энэ үүргээ биелүүлээгүй хүнтэй хариуцлага тооцно. Эрүүгийн хууль, зөрчлийн хуулиар арга хэмжээнүүдийг авна гэж ЦЕГ-ын Нийтийн хэв журам хамгаалах, олон нийтийн аюулгүй байдлыг хангах албаны дарга, цагдаагийн хурандаа Ж.Амгалан хэллээ.

Тэрбээр бид гаргаж байгаа зөрчлүүдийг баримтжуулах ажлыг явуулж байгаа. Дэглэмийн тодорхой хугацаа дуусаад шинжилгээ нь сөрөг гарсан үед бүгдтэй нь хатуу хариуцлага тооцно гэдгийг анхааруулж байна. Гаргаж байгаа зөрчил болгон дээр хариуцлага ирнэ шүү. Энэ үйлдлүүдээ таслан зогсоохгүй ямар нэгэн байдлаар эсэргүүцээд байгаа хүмүүсийг хэвлэл мэдээллийн хэрэгслээр олон нийтэд зарлана гэсэн юм.

Д.Алигэрмаа