ЭМЯ: Италиас ирсэнээ нууж ажилдаа очсон 2 иргэнийг олж, тандалт судалгаа хийж байна
Хятадаас гадна коронавирусын халдвар хамгийн их тархаж байгаа улс орнуудын жагсаалтыг БНСУ, дараа Итали улс тэргүүлж буй. Итали улсад өнөөдрийн байдлаар халдвар авсан хүний тоо 3,089-д хүрсэн бол нас барсан хүний тоо 107 болж нэмэгдээд байна. Нийт халдвар авсан хүнийхээ тоогоор Хятадаас гадна БНСУ 5,766 халдварын тохиолдлоор ( нас баралтын тоо 35) Хятадын дараа ороод байгаа ч Итали улс нас баралтаараа Хятадын дараа дэлхийд тэргүүлж байгаа билээ.
Гэтэл ийм өндөр эрсдэлтэй бүс нутгаар дамжаад манай улсын хоёр иргэн хоёр хүүхдийн хамт аялаад ирсэнээ нууж хил нэвтрээд түүгээр ч зогсохгүй ажилдаа очиж маш ноцтой эрсдэл хийсэн болохыг өнөөдөр ЭМЯ-наас ээлжит мэдээллийнхээ үеэр зарлалаа.
ЭМЯ-ны Эмнэлгийн тусламжийн газрын дарга Я.Буянжаргал: Өнөөдөр Нур-Султан-Улаанбаатарын онгоцоор 27 зорчигч ирснээс нэг хүнийг Багабаян амралтын газарт ажиглалтад аваад байна. Туркиш эйрлайнсын нислэгээр 230 зорчигч ирсэн. Тэднээс Итали улсад зорчсон хоёр монгол иргэнийг ХӨСҮТ-д тусгаарлахаар хүргүүлээд байна.
Өчигдөр Москва-Улаанбаатар чиглэлийн 07:15 цагийн нислэгээр нэг гэр бүлийн гурван хүн Итали улсаар дамжин зорчоод ирснээ мэдээлэлгүй ирснийг хууль, хяналтын байгууллагаар дамжуулан хайж олсон.
Энэ хүмүүс хоёрдугаар сарын 12-нд Улаанбаатараас гараад Женев, Женевээс Италийн Милан, буцаад Женевт ирээд дахин Франц руу яваад эргээд Женевээс Москвагаар дамжиж Улаанбаатарт ирсэн байсан. Энэ хүмүүс үүнийг нуусан, буугаад шууд ажил дээрээ очсон гэсэн мэдээлэл аваад ажил дээр нь очиж мандалт судалгаа хийлээ. Энэ бол иргэний маш хариуцлагагүй үйлдэл. ДЭМБ-аас энэ халдварыг том биш шүү гэж анхааруулж байгаа. Нас баралт 3,4 хувьтай гэж хэлээд байхад иргэдийн хариуцлага маш чухал байна.
Д.Алигэрмаа
