Дэлхийн банк Covid-19-тэй тэмцэж байгаа улс орнуудад 12 тэрбум долларын яаралтай тусламж үзүүлэхээр боллоо
Шинэ төрлийн "коронавируcын тархалтаас үүдэлтэй эрүүл мэндийн салбарын болон эдийн засгийн асуудлыг шийдэхэд хөгжиж буй орнуудад цаг алдалгүй туслах зорилгоор 12 тэрбум ам.доллар хүртэлх санхүүжилт олгохоор боллоо гэж Дэлхийн Банк зарлалаа.
Энэхүү санхүүжилт нь Covid-19-ын коронавирусын сөрөг нөлөөллийг багасгах, үр дүнтэй хариу арга хэмжээ авахад зориулж гишүүн орнууддаа олгоход зориулагджээ.
Дэлхийн банк нь энэхүү шуурхай арга хэмжээнд зориулсан 12 тэрбум долларын шинэ багцын тусламжтайгаар хөгжиж буй орнуудын эрүүл мэндийн тогтолцоог бэхжүүлэх юм.
Энэ хүрээнд голомт бүхий бүс нутгаас ирсэн хүмүүсийн болзошгүй эрсдлээс хамгаалах эрүүл мэндийн үйлчилгээг сайжруулах, өвчний тандалтийг чангаруулах, нийгмийн эрүүл мэндийн оролцоог дэмжих, эдийн засаг дахь нөлөөллийг бууруулахын тулд хувийн хэвшилтэй хамтран ажиллах зэрэг арга хэмжээнүүдийг авах юм байна.
Үүнээс гадна АНУ-ын Засгийн газар коронавирусын халдварын өндөр эрсдэлтэй 25 улс оронд АНУ-ын Олон улсын хөгжлийн агентлагийн Халдварт өвчний яаралтай тусламжийн сангаас 37 сая долларын санхүүжилтийг олгохоор болсноо өнөөдөр зарласан.
Тусламжийн санхүүжилтийг тус улсын Яаралтай халдварт өвчний сангаас гаргах бөгөөд ДЭМБ болон бусад агентлагуудаар дамжуулан тусламж авах орнуудад очих аж. Энэ нь өнгөрөгч хоёрдугаар сарын 7-нд АНУ-ын Төрийн департаментын зүгээс танилцуулсан 100 сая ам.доллар хүртэлх тусламжийн эхний санхүүжилт юм.
ОУХА-ын 37 сая ам.долларын энэхүү тусламжид – Монгол Улс, Афганистан, Ангол, Индонез, Ирак, Казахстан, Кени, Өмнөд Африк, Тажикстан, Филиппин, Туркменистан, Узбекистан, Замби, Зимбабве, Бангладеш, Бирм, Камбож, Этиоп, Киргизстан, Лаос, Непал, Нигери, Пакистан, Тайланд, Вьетнам зэрэг орнууд хамрагдах юм.
Эх сурвалж World Bank, Usaid.gov
Д.Алигэрмаа
