2019 онд худалдааны маргаанаас болж асуудалтай байсан Солонгосын эдийн засагт коронавирус дахин нэрмээс болов
Дэлхийн эдийн засгийн бууралт, гадаад худалдааны экспортын үйл ажиллагааны тодорхой бус байдлаас шалтгаалж БНСУ-д дөрвөн жилийн хугацаанд анх удаагаа 2019 онд нэг хүнд оногдох үндэсний орлого буурсан гэж Солонгосын төв банкнаас өнөөдөр мэдээллээ.
Төв банкны мэдээллээр өнгөрсөн жил Солонгосын нэг хүнд оногдох үндэсний орлого 32,047 долларт хүрч 2018 оноос 4,1 хувиар буурчээ. Энэ нь 2015 онд MERS-ын дэгдэлтээс болж эдийн засагт хүндрэл гарч байснаас хойш үзэгдсэн анхны бууралт болж байгаа аж.
Энэ бууралтыг өнгөрсөн жил Хятад болон АНУ-ын хооронд өрнөсөн худалдааны маргаан хурцдах үеэр нийт аж ахуйн нэгж, корпорацийн орлого багассантай хамааруулж ойлгож болох юм.
Улсын дотоодын нийт бүтээгдэхүүний бодит өсөлт 2019 онд 2 хувьтай гарсан ч зах зээлийн өнөөгийн үнэ цэнээр хэмжигдэх нэрлэсэн ДНБ тухайн цаг хугацаанд чадан ядан 1,1 хувиар өссөн гэж Төв банк мэдээлэлдээ дурьдав.
Үнийн өөрчлөлтийн түвшинг харуулсан ДНБ-ны индекс 2018 онтой харьцуулбал 2019 онд 0,9 хувиар буурсан гэдгийг харуулж буй. Энэ бол 1999 онд Азийн санхүүгийн хямрал болсноос хойш гарч байгаа том уналтад тооцогдож байгаа аж.
Хүмүүсийн бодит худалдан авах чадавхийг илтгэдэг нэг хүнд оногдох бодит үндэсний орлого 2019 онд 0,3 хувиар өссөн нь 1998 онд 7,7 хувийн бууралтаас хойших хамгийн бага өсөлт байв. Харин нэрлэсэн үндэсний орлого 1,7 хувийн өсөлттэй байсан ч энэ нь мөн л 1998 оноос хойших хамгийн бага өсөлт байжээ.
Гадаад тодорхойгүй нөхцөл байдал нь Солонгосын эдийн засгийг өнгөрсөн жил таагүй нөхцөл байдалд оруулсан бөгөөд хагас дамжуулагчийн чип нь тус улсын экспортын гол бүтээгдэхүүнүүдийн нэг төдийгүй эдийн засгийн өсөлтийн голлох хүчин зүйлийн нэгд тооцогддог.
Ийнхүү 2019 он Хятад АНУ болон Солонгос Японы худалдааны маргаанаас үүдэж БНСУ-ын эдийн засаг нэгэн хүндрэлийг даван туулсан бол одоо шинэ коронавирусын дэгдэлтээс үүдсэн бас нэгэн сорилтийг даван туулах гэж байна.
Эдийн засагчид энэ жилийн тухайд өнгөрсөн жилтэй ойролцоо байхаар байна гэж урьдчилан таамаглаад байгаа аж.
Эх сурвалж The Korea Times
Д.Алигэрмаа
