Хятадаас гадна 25 улсад Коронавирусын халдвар тархаад байна
Эрүүл мэндийн яамнаас цаг үеийн асуудлаар өнөөдрийн ( 2020.02.18) мэдээллийг өглөө.
ЭМЯ-ны Олон нийттэй харилцах, тандалт шуурхай удирдлагын хэлтсийн дарга Д.Нарангэрэл: Дэлхий дахинд шинэ коронавирусийн халдвар тархах нөхцөл байдалтай байгаа энэ цаг үед Эрүүл мэндийн яамнаас үнэн бодит, баталгаат мэдээллийг хурлаараа дамжуулан өгч байгаа. Энэ өдрийн хурлыг Гэмтэл согог судлалын үндэсний төвийн эмч нар "Нэг дэлхий-Нэг хүч” уриан дор БНХАУ-ын Ухань хотод ажиллаж буй эмч нартаа нэг өдрийн цалингаа хандивлан, сэтгэл санаагаар дэмжихээр болсон тухай сайхан мэдээгээр эхлүүлж байна.
ДЭМБ-ын мэргэжилтэн О.Ариунтуяа: 2020 оны хоёрдугаар сарын 18-ны 10:00 цагийн байдлаар 73,331 тохиолдол, 1,872 нас баралт бүртгэгдсэн. Хятадаас гадна 25 улсад 803 тохиолдол, 3 нас баралт гараад байна.
2019 оны арванхоёрдугаар сарын 8-наас 2020 оны нэгдүгээр сарын 11-ний өдөр хүртэл хугацаанд COVID-19 халдварын 72,314 тохиолдолд хийсэн судалгаагаар нийт тохиолдлын 86.6 хувь 30-79 насанд бүртгэгдсэн.
Шинэ коронавирусийн халдварын дэгдэлт нэгдүгээр сарын 23-26-нд оргилдоо хүрч буурах хандлагатай байна. Эмнэлгийн 1,716 ажилтан халдвар авснаас 5 нь нас барсан.
Нийт тохиолдлын 80.6 хувь нь хөнгөн явцтай, нас баралтын түвшин 2.3 хувь.
COVID-19 Хубэй мужид өмнөх оны арванхоёрдугаар сард гарч эхлээд 30-хан хоногийн дотор нэг хотоос хурдацтайгаар 31 мужийн 1,386 нэгжид тархсан.
Нас баралтын түвшин
- 80-аас дээш насныханд хамгийн өндөр буюу 15 хувь,
- Зүрх судас, даралт ихсэх, чихрийн шижин, хавдар, амьсгалын замын архаг болон хавсарсан өвчтэй хүмүүст 5-10 хувь ,
- Маш хүнд гэж оношлогдсон хүмүүст 49 хувь,
- Хөнгөн болон дунд гэж оношлогдогсдод нас баралт бүртгэгдээгүй.
БНХАУ нэгдүгээр сарын 20-нд халдварт өвчний болон хөл хорио тогтоох тухай хуульдаа өөрчлөлт оруулж, COVID-19 халдварыг хоёрдугаар зэрэглэлийн халдварт өвчнөөр бүртгэж эхэлсэн. Тухайн сарынхаа 23-наас хөл хорио тогтоож, 25-нд удирдлагыг дээд шатандаа шилжүүлж, бусад салбарыг дайчилж эхэлсэн байна.
ДЭМБ-аас хавьтлын тусгаарлалтыг 14 хоног үргэлжлүүлэхийг зөвлөж байгаа гэсэн юм.
Ж.Эрхэс
